Surat Dari Kampuang

surat dari kampung

Nak Kanduang dagang di rantau
Jawek lah pasan ranah tapian
Kami kok indak ka dagang silau
Sapucuak surek tolong layangkan

Kirimkan kami surek sapucuak
Elok jo buruak dibaritokan
Rusuah nak samo kito pujuak
Gamang nak samo dirasokan

Jikok batanyo urang ka kami
Apolah rundiang ka kami jawab
Saribu sasa dalam hati
Dagang bangih indak basabab

Manuruik carito kaba buruang
Dagang lah banyak salah jalan
Bujang banyak ditangkok binguang
Gadih lah banyak nan hilang padoman

Jikok batua mako tajadi
Mungkin dagang malulua sumpah
Lah hilang cahayo matohari
Kiamat nagari Rasulullah

Kami lapeh dagang bajalan
Bukan untuak marantau cino
Mancari ilmu jo pangalaman
Mambangun kampuang jo pusako

Tapi kini apo disabuik
Balain tasuo jo nan dicinto
Layangan putuih, banang lah kusuik
Kumpalan apo lai gunonyo

Kami tak harok jo pakirim
Asa batamu kami lah sanang
Ka panjago silaturrahim
Pamupuak kasih jo sayang

Tapi kini apo dibaco
Kaba indak, barito pun indak
Surek sapucuak haram tibo
Lah hilang rindu jo taragak

Jalan salangkah lupo suruik
Dek lamak lenggok malenggang
Gilo dek rayu rumpuik saruik
Sirieh mawa layua di batang

Dagang lah mabuak jo kiambang
Di kampuang mawa lah jadi karisiak
Manangih lasuang di pintu kandang
Kinantan tabang tak babaliak

Padi taserak lah jadi salibu
Jaguang di kaka lah baurek
Banang lawah manutuik pintu
Kandang lapuak sangkak lah kuyak

Surau langang, balai lah sunyi
Lah hilang lagu dek badendang
Tapian indak sumarak lai
Aia janiah, ikan mahilang

Labuah luruih kini manyimpang
Ulah dialiah dek urang lalu
Cupak di tuka rang padagang
Lah abih galeh baru tau

Pinang mudo layua dibatang
Arai mayang manyasak kulik
Sadah masiak, gambia lah jalang
Carano lah jadi barang antik

Tamanuang pinyaram jo galamai
Wajik maratok di kuali
Tak mungkin lai badan tapakai
Baralek gadang lah jarang kini

Antah ka jadi ka buah tangan
Panyanangan hati rang di Jawo
Elok katiko sadang makan
Kanyang lah lupo di ma asanyo

Manyasa puluik jadi katan
Urang bakandak bareh ampiang
Angek pariuak lah ditahan
Urang manulak masuak piriang

Lai bana badan tapakai
Indak labiah ka kawan kopi
Taonggok duduak dalam kadai
Manunggu urang minum pagi

Dimakan urang sambia galak
Maota sambia bagarah
Lai bana mangatokan lamak
Di harago bakandak murah

Ratok kok lai dagang simak
Himbau kok lai basahuti
Pintak kami indak doh banyak
Pulang kampuang, janguak lah nagari

Tatumpah kasiah di tanah Jawo
Sayang jo kami usah lupokan
Usah turuikkan pandangan mato
Kato batin cubo dangakan

Condong ka nan rancak, pandangan mato
Lamak salero mako bakulek
Kalau lah setan nan mandayo
Kadang tubo tasangko ubek

Mako di kami nan marusuah
Dagang kok mabuak jo kiambang
Mukasuik mahapuih paluah
Palak lapeh, gata nan datang

Ingek-ingek sabalun kanai
Bakulimek sabalun abih
Pinjaik dapek kapak tagadai
Kok batuka galak jo tangih

Kok nyampang surek indak babaleh
Kaba kok indak datang juo
Isi mukasuik kok kurang jaleh
Dangakan sajo surek kaduo

One Response

  1. lai ndak karangan urang khan da????haahaahahahhaha

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: